現代鳥仔名台語新詞討論
為著予大家認捌鳥仔 ê 台語，我整理這个清單，予大家方便揣鳥仔 ê 台語名。《現代鳥仔名台語新詞討論》依據上新 ê 鳥類分類研究佮 號明理路，盡量為每 1 種鳥仔揣適合 ê 名，希望會當藉著認捌鳥仔 ê 名，嘛有愈來愈濟人來使用這个漸漸消失 ê 語言。
為何欲創作《現代鳥仔名台語新詞討論》？
- 隨著中国国民党來台，迫害本土言語 ê 發展，現代鳥仔分類 ê 研究主要是依華語為主，真濟鳥仔 ê 台語名猶原是停留 tī 日本時代，無法度配合上新 ê 鳥仔分類研究，辭典內底嘛攏揣無。仝款 1 个台語俗名，過去可能干焦知影 1 个物種，毋過因為研究 ê 進步，這馬才知影 毋但 1 个物種，紲攏無合適 ê 俗名來討論。
- 市面上 ê 鳥仔名簿主要是使用華語，用台語寫 ê 鳥仔名簿是誠少，為著補紩這 ê 空缺，《現代 鳥仔名台語新詞討論》依現代分類學 ê 角度，重新看待台灣本土 ê 鳥仔名，所以內底包含真濟台語新詞 ê 創作，目的是鼓勵咱去揣看覓，敢有較適合鳥仔物種 ê 台語名，向望未來會當有 1 本台語為主 ê 鳥仔名簿。
- 若是以前無佇台灣生活 ê 鳥仔，抑是外國 ê 鳥仔，可能嘛無合適 ê 台語名。
- 真濟人認為專業領域干焦會當用華語講，毋過其實台語佮日語、英語仝款，有文法、有專門 ê 字，認捌鳥仔當然嘛會當用台語講！
來看這 ê 範例，水尖仔是一般鷸科鳥仔 ê 統稱，有真濟物種攏會使叫水尖仔，這是水尖仔、彼嘛是水尖仔，用台語講，會毋知是佗 1 ê 物種，除非用華語講「黦鷸」。
《現代鳥仔名台語新詞討論》ê 目標就是去解決這个問題。若依據伊 ê 外觀形體，叫伊「âng-io-thô͘-lâng-kau-u̍t 紅腰土礱鉤鷸」仰是「âng-io-thô͘-lâng-kau-á 紅腰土礱鉤仔」著非常清楚，嘛會當佮其他 ê 水尖仔區別。
號名理路 hō-miâ lí-lōo
- 若是有台灣本土 ê 台語俗稱，代先使用。
- 若是台灣本土 ê 台語俗稱是統稱，但是毋但 1 ê 物種，參考英語、日語、華語 ê 用法，頭前加形容詞區別。
- 若揣無台灣本土 ê 台語俗名，原則上盡量尊重中華野鳥協會公告 ê 華語台灣鳥類名錄命名。毋過因為華語 ê 氣口不一定對同台語 ê 用法，所以嘛會參考英語、日語、鳥仔 ê 形體外觀、色水命名。
- 分類名盡量用台灣本土 ê 台語號名。
- 羅馬字使用白話字。
- 範例 1
- 範例 2
- 範例 3
- 範例四
- 範例五
下跤 ê 物種攏是青笛仔
- 斯氏繡眼 -> su-sī-chheⁿ-thî-á 斯氏青笛仔
- 日菲繡眼 -> ji̍t-hui-chheⁿ-thî-á 日菲青笛仔
- 低地繡眼 -> kē-tē-chheⁿ-thî-á 低地青笛仔
- 紅脇繡眼 -> chhiah-koh-chheⁿ-thî-á 赤胳青笛仔
下跤 ê 物種攏是水避仔 ê 1 種
- 小鸊鷉 -> chúi-pī-á 水避仔
- 角鸊鷉 -> kak-chúi-pī 角水避
- 赤頸鸊鷉 -> âng-kún-chúi-pī 紅頸水避
- 冠鸊鷉 -> chhàng-mo͘-chúi-pī 聳毛水 避
- 黑頸鸊鷉 -> o͘-kún-chúi-pī 烏頸水避
下跤 ê 物種無佇辭典
- 鐵嘴鴴仔 -> kāu-chhùi-hêng-á 厚喙鴴
- 赤腹鶇仔 -> âng-pak-tong-á 紅腹鶇
- 堪察加柳鶯 -> Kham-chhat-ka-liú-eng 堪察加柳鶯
- 紅喉潛鳥 -> âng-âu-chhàng-chúi-chiáu 紅喉藏水鳥
mā 會參考日語、英語，無一定參考華語
- 褐翅鴉鵑 -> tōa-chháu-kok 大草嘓
- 斑背潛鴨 -> lêng-ah 鈴鴨
- 蠣鴴 -> chia̍h-ô-á-chiáu 食蚵仔鳥
分類名盡量用台灣本土 ê 台語號名
- 夜鷹目 -> chio̍h-ki-á-ba̍k 石磯仔目
- 鸊鷉科 -> chúi-pī-á-koa 水避仔科
- 秧雞科 -> bí-ke-á-koa 米雞仔科
- 水雉科 -> lêng-kak-niû-koa 菱角鳥科
- 草鴞科 -> kâu-bīn-eng-kho 猴面鷹科
鳥仔名 ê 註解
- 🎯：推薦做為這个唯一物種 ê 台語俗名。
- ✳️：統稱，有 2 個以上 ê 物種攏會使叫這个名。
重要 ê 參考
- 📕 上新 ê 分類參考 eBird kah eBird Taiwan鳥類名錄 2025.10 (製表：eBird Taiwan))。
- 📕 台語俗名參考 《Hêng góa Tâi-oân Chiáu-á Miâ（還我台灣鳥á名）》 kah 《台灣野鳥鄉土名》。
- 📕 華語俗名參考 eBird 佮台灣生物多樣性網絡。
- 📕 台語字參考 ChhoeTaigi 台語辭典 kah 教育部臺灣台語常用詞辭典。
- 📕 鳥仔 ê 外觀參考 The Sibley Field Guide by David Allen Sibley。
- 📕 鳥仔冊參考台灣野鳥手繪圖鑑(二版)。
- 📕 鳥仔圖使用 iNaturalist 面頂 ê
CC0、CC-BY、CC-BY-NC授權。
聯絡我
這个網站大部分是利用下班有閒 ê 時間來寫，所以翻新 ê 速度較慢。你若有發現寫毋著 ê 所在，抑是有建議 ê 名，請寫電子批共我講，我會盡量揣時間來改，請手梳攑懸，多謝！
- ✉️ 電子批: minsiansu@gmail.com
- 📸 相片冊: siansiansu